Што яшчэ адбываецца ў сьвеце, каротка
- Латвія ўвяла надзвычайнае становішча праз пандэмію каранавірусу, яно будзе дзейнічаць ад 13 сакавіка да 14 красавіка. Навучаньне да канца надзвычайнага становішча будзе дыстанцыйным, масавыя мерапрыемствы на больш як 200 удзельнікаў забароненыя, латышам не рэкамэндуюць езьдзіць за мяжу.
- Літва на пяць тыдняў закрыла дзіцячыя садкі і школы, забараніла ўсе мерапрыемствы ў закрытых памяшканьнях на больш як 100 чалавек і мерапрыемствы на вольным паветры.
- Польшча закрыла на два тыдні дзіцячыя садкі, перавяла школы і ўнівэрсытэты на дыстанцыйнае навучаньне, прыпыніла працу тэатраў і канцэртных заляў.
- Армэнія закрыла на карантын усе навучальныя ўстановы, тэрміны карантыну пакуль ня вызначылі.
- Нямеччына забараніла ўсе масавыя мерапрыемствы на больш як 1000 удзельнікаў і «ўсе неабавязковыя мерапрыемствы» з нават меншай за тысячу колькасьцю ўдзельнікаў. Швэцыя забараніла ўсе масавыя мерапрыемствы на больш як 500 удзельнікаў. Казахстан — проста ўсе масавыя мерапрыемствы без удакладненьня пра колькасьць удзельнікаў.
- Італія зафіксавала надзвычай вялікую колькасьць новых выпадкаў COVID-19: плюс тры тысячы з 11 да 12 сакавіка.
- Нарвэгія ўвяла 14-дзённы карантын для тых, хто з канца лютага прыехаў зь нескандынаўскіх краінаў, нарвэскія ўлады не рэкамэндуюць турыстам наведваць краіну.
- NHL (Нацыянальная хакейная ліга ЗША) прыпыніла сэзон, дату аднаўленьня гульняў не называлі. NBA (Нацыянальная баскетбольная ліга ЗША) прыпыніла сэзон «да далейшых зьвестак».
- Кітай: колькасьць новых інфікаваных амаль перастала расьці, колькасьць актыўных выпадкаў спадае. Афіцыйны прадстаўнік Міністэрства замежных справаў Кітаю выказаў здагадку, што COVID-19 нібыта мог быць завезены ў кітайскі Ўхань амэрыканскімі вайскоўцамі.
- Канада: Сафі Грэгуар-Трудо, жонка прэм’ер-міністра, заразілася COVID-19. Хвароба працякае ў лёгкім стане, але жанчына ізаляваная. Ейны муж, прэм’ер Джастын Трудо, будзе 14 дзён працаваць з карантыну, але на вірус яго пакуль не правяраюць.
- Вялікая Брытанія: у лік інфікаваных трапіў галоўны трэнэр футбольнага клюбу «Арсэнал» Мікель Артэта. Да таго ён меў кантакты з уладальнікам грэчаскага клюбу «Алімпіякос», у якога таксама выявілі каранавірус. Асноўны склад «Арсэналу» і пэрсанал, які кантактаваў з трэнэрам, на двухтыднёвай самаізаляцыі, цэнтар трэніровак клюбу закрыты. Таксама на карантыне футбольны клюб «Чэлсі» — вірус выявілі ў паўабаронцы Калума Гадсана-Адоі. Матчы Прэм’ер-лігі пакуль не скасавалі, цягам пятніцы будуць абмяркоўваць адзіную стратэгію лігі ў сувязі з каранавірусам. На момант публікацыі «Чэлсі» займае 4-е месца, «Арсэнал» — 9-е з 20 у ангельскай Прэм’ер-лізе.
У Нью-Ёрку надзвычайны стан у сувязі з каранавірусам
Успышка каранавірусу парушыла звыклы рытм жыцьця амэрыканцаў: усё больш прафэсійных спартовых лігаў (у ліку якіх NBA і NHL) прыпыняюць сэзоны, тэатры на Брадвэі адмяняюць спэктаклі, а новыя абмежаваньні справакавалі хаос у трансатлянтычных авіяперавозках.
Штаты Каліфорнія і Нью-Ёрк увялі забарону на масавыя імпрэзы. Закрываецца ўсё больш школаў, музэяў ды іншых установаў.
Мэр Нью-Ёрку Біл дэ Блязыё ў чацьвер абвясьціў надзвычайнае становішча, у той час як колькасьць пацьверджаных выпадкаў захворваньня ў самым населеным горадзе краіны вырасла да 95.
З мэтай запаволіць распаўсюд віруснай інфэкцыі ў штаце Нью-Ёрк з 17:00 у пятніцу забароненыя імпрэзы колькасьцю звыш 500 чалавек, абвясьціў на прэс-канфэрэнцыі губэрнатар Эндру Куома. Установы, якія зьмяшчаюць да 500 чалавек, зь пятніцы павінны ўдвая скараціць колькасьць наведнікаў.
- На раніцу 13 сакавіка ў сьвеце зафіксавалі больш за 134,7 тысячы выпадкаў COVID-19: каля 81 тысячы ў Кітаі, 15,1 тысячы ў Італіі, 10,1 тысячы ў Іране, 8 тысяч ў Паўднёвай Карэі, 2,9 тысячы ў Францыі, 3,1 тысячы ў Гішпаніі, 2,7 тысячы ў Нямеччыне, каля 1,8 тысячы ў ЗША.
- Ад хваробаў, якія выклікаў новы каранавірус, у сьвеце памерлі 4983 чалавекі: 3180 у Кітаі, 1016 у Італіі, 429 у Іране, 86 у Гішпаніі, 67 у Паўднёвай Карэі, 61 у Францыі, 41 у ЗША.
- Выпісалі здаровымі 70,4 тысячы пацыентаў, у цяжкім стане знаходзяцца каля 5,7 тысячы пацыентаў.
- У Беларусі пацьвердзілі 21 выпадак COVID-19. Самага першага пацыента, у якога выявілі каранавірус, 12 сакавіка выпісалі з шпіталя.
Бразыльскі чыноўнік, які сустракаўся з Трампам, заражаны COVID-19
Памочнік прэзыдэнта Бразыліі, які прысутнічаў на сустрэчы з прэзыдэнтам ЗША Дональдам Трампам ў Маямі, заражаны каранавірусам. Пра гэта паведамляе AFP са спасылкай на заяву бразыльскага ўраду.
Фабіё Вайнгартэн суправаджаў кіраўніка Бразыліі Жаіра Балсанару падчас візыту ў ЗША. Пасьля сустрэчы ў Маямі памочнік разьмясьціў у сябе ў «Інстаграме» фота, на якім ён стаіць побач з Трампам і віцэ-прэзыдэнтам ЗША Майкам Пампэо.
У Бразылію Вайнгартэн вярнуўся 12 сакавіка. Пасьля вяртаньня ў яго выявілі прыкметы грыпу. Цяпер памочнік Балсанару знаходзіцца на карантыне. Прэзыдэнт Бразыліі і ўдзельнікі дэлегацыі, якія пабывалі ў ЗША, знаходзяцца пад наглядам лекараў.
«Скажам так: я не занепакоены», — пракамэнтаваў Трамп зьвестку пра хваробу Вайнгартэна.
У Беларусі да 6 красавіка абмежавалі масавыя мерапрыемствы зь міжнародным удзелам
12 сакавіка на спэцыяльнай нарадзе ў Савеце міністраў прынялі рашэньне да 6 красавіка абмежаваць усе культурна-масавыя, спартовыя і навуковыя мерапрыемствы зь міжнародным удзелам, паведмляе Міністэрства аховы здароўя.
Паводле міністэрства, гэта дапаможа зьнізіць рызыку завозу віруса зь іншых краінаў.
Колькасьць хворых на каранавірус у Беларусі вырасла з 12 да 21 чалавека
Паводле Міністэрства аховы здароўя, зь лябараторна пацьверджаным каранавірусам у шпіталях Беларусі знаходзіцца 21 чалавек.
«Да канца красавіка, найбольш імаверна, усё закончыцца, але гэта недакладна» — галоўны лекар дзіцячага шпіталя Менску
«Усе эпідэміі заканчваюцца, ёсьць пэўныя заканамернасьці, таму і каранавірусная інфэкцыя мае пайсьці на спад» — лічыць Максім Ачарэтні, галоўны лекар 3-га дзіцячага шпіталя Менску. Яго спэцыяльнасьць анэстэзіёляг-рэаніматоляг, больш за 12 гадоў ён працаваў у дзіцячай рэанімацыі, некалькі гадоў працаваў у дзіцячым інфэкцыйным шпіталі.
Максім Ачарэтні падкрэсьлівае, што ягоная ацэнка — пункт гледжаньня лекара-спэцыяліста, а не інфэкцыяніста, і ён абапіраецца на агульныя мэдычныя веды і досьвед працы як анэстэзіёлягам, так і ў тэрапіі інфэкцыйных хваробаў.
Каранавірус: першая сьмерць у Польшчы. Што робіцца ў суседзяў Беларусі 12 сакавіка
У краінах Усходняй Эўропы колькасьць зафіксаваных выпадкаў каранавірусу абмяжоўваецца дзясяткамі ці нават адзінкамі хворых. Аднак некаторыя суседнія зь Беларусьсю краіны ўжо абвясьцілі надзвычайнае становішча, каб абмежаваць пашырэньне вірусу.
Колькасьць хворых на каранавірус дасягнула 21 чалавека
Паводле Міністэрства аховы здароўя, зь лябараторна пацьверджаным каранавірусам у шпіталях Беларусі знаходзіцца 21 чалавек.
Італія вырашыла закрыць усе крамы і рэстараны
Італьянскі ўрад 12 сакавіка абвясьціў аб увядзеньні дадатковых абмежавальных захадаў у сувязі з каранавірусам. Тэрмінам на два тыдні закрыюцца ўсе крамы, бары і рэстараны, за выняткам харчовых крамаў і аптэкаў.
Чарговае ўзмацненьне жорсткасьці захадаў бясьпекі адбылося пасля таго, як колькасьць ахвяраў COVID-19 перавысіла 800, а колькасць выпадкаў захворвання – 12 000. Паводле экспэртаў, распаўсюджаньне хваробы ў Італіі прыблізна на 10-15 дзён апярэджвае іншыя эўрапейскія краіны, такія як Францыя і Нямеччына, і ім трэба ўзяць прыклад Італіі.
Як у Гомлі рэагуюць на каранавірус
10 сакавіка 20-гадовага гомельскага спартоўца шпіталізавалі з каранавірусам. Свабода праверыла, як паўмільённы абласны цэнтар адрэагаваў на першы выпадак каранавірусу.
Спартоўцы, якія трапілі пад карантын, займаюцца ў спэцыялізаванай дзіцяча-юнацкай спартыўнай школе № 4. Школа падрыхтавала сотні майстроў спорту, у тым ліку міжнароднай клясы, у спартыўнай акрабатыцы, мастацкай гімнастыцы, скоках на батуце. Цяпер тут займаюцца больш за 700 дзяцей. Школу не закрывалі на карантын. У адміністрацыі кажуць, што няма падставаў. Сёньня тут праходзіць спартакіяда. Спаборніцтвы працягнуцца цэлы дзень.
Чытаць увесь рэпартаж ТУТ.
У Чэхіі ўвялі надзвычайнае становішча
Эўрапейскія краіны ў чацьвер прымаюць новыя жорсткія захады ў сувязі з пандэміяй новай каранавіруснай інфэкцыі.
У Чэхіі, дзе, паводле афіцыйных дадзеных, каля 100 інфікаваных, уведзена надзвычайнае становішча. На межах зь Нямеччынай і Аўстрыяй адноўлены кантроль. Грамадзянам 13 краінаў забаронены ўезд у краіну. Забароненыя сходы з колькасьцю ўдзельнікаў больш за 30. Будуць зачыненыя ўсе забаўляльныя ўстановы і ўстановы культуры, абмежаваны час працы рэстаранаў. Раней на гэтым тыдні былі закрытыя ўсе школы.
Славаччына забараніла ўезд усім замежнікам, акрамя тых, якія маюць у краіне від на жыхарства. Будуць закрытыя школы, аэрапорты, рэстараны. Аб закрыцьці школаў абвешчана таксама ў Ірляндыі.
Студэнтаў БДУ, якіх забралі з інтэрнату, прывезьлі ў шпіталь у Бараўлянах
У Міністэрстве адукацыі Беларусі паведамілі, што «пакуль вучоба ўва ўсіх навучальных установах ідзе ў штатным рэжыме».
«Але паўсюль праводзяцца неабходныя прафіляктычныя і санітарна-эпідэміялягічныя захады. Пры любых праявах вострарэсьпіраторных захворваньняў раім зьвяртацца да мэдыкаў і трымацца парадаў Міністэрства аховы здароўя. Галоўнае не панікаваць», — паведамілі карэспандэнту Свабоды ў прэс-службе Міністэрства адукацыі.
У БДУ групу студэнтаў, якіх аднесьлі да «кантактаў ІІ узроўню» (гэта значыць, яны не кантактавалі з хворым шчыльна), зьмясьцілі ў шпіталь вэтэранаў для далейшых тэстаў на новы каранавірус.
«У БДУ хворыя на каранавірус студэнты пакуль ня выяўлены», — як працуюць менскія ўнівэрсытэты
Жыхара адзінай у Эўропе краіны без COVID-19 затрымалі за чуткі пра захворваньні
Паліцыя сталіцы Чарнагорыі Падгорыцы затрымала на 72 гадзіны яе жыхара па абвінавачаньні ў распаўсюдзе дэзынфармацыі пра каранавірус у краіне, паведамляе «Інтэрфакс», спасылаючыся на чарнагорскую тэлевізію.
У Інстытуце грамадзкай аховы здароўя Чарнагорыі падкрэсьлілі, што пакуль у краіне ня выявілі ні аднаго выпадку заражэньня каранавірусам COVID-19, дадаючы, што ў выпадку выяўленьня нават аднаго такога выпадку грамадзкасьць будзе праінфармаваная неадкладна.
У Польшчы зафіксавалі першую сьмерць ад каранавірусу
У Польшчы зафіксавалі першы сьмяротны выпадак захворваньня каранавірусам. Першай ахвярай хваробы стала 57-гадовая жанчына, якая праходзіла лячэньне ў
Познані. Пра гэта паведаміў намесьнік мэра Познані Енджэй Салярскі, перадае Польскае радыё.
«Да гэтага часу ў нас зафіксаваныя два выпадкі заражэньня, адзін пацыент памёр. Лекар ужо паведаміў пра гэта сям’і нябожчыцы. Астатнія два пацыенты адчуваюць сябе добра. У той жа час пад наглядам лекараў знаходзяцца 16 чалавек», - сказаў намесьнік мэра Познані.
Нагадаем, на сёньняшні дзень у Польшчы выяўлена 47 выпадкаў захворваньня каранавіруснай інфэкцыяй. За апошнія суткі было зарэгістравана 16 новых выпадкаў.
«Трывожна», але «паніцы не паддаюся», — Шушкевіч, Кустава, Канапацкая і Вольскі пра тое, як на іх жыцьцё ўплывае каранавірус
Спыталі вядомых беларусаў, ці мяняюць яны свае асабістыя і прафэсыйныя пляны праз пандэмію каранавірусу ў сьвеце.
Сьцісла:
- Станіслаў Шушкевіч, палітык: «У Польшчы да гэтага ставяцца больш сур’ёзна, чым у Беларусі».
- Ганна Канапацкая, палітык: «Наколькі наша ўлада гатовая прыняць гэты выклік?».
- Лявон Вольскі, музыка: «Адчуваецца трывожнасьць».
- Валярына Кустава, літаратарка, журналістка: «Да нас усё даходзіць зь вялікім спазьненьнем».
«Няма мукі, мыла, кансэрваў». Беларускі з Польшчы пра змаганьне краіны з каранавірусам
На 12 сакавіка ў Польшчы выявілі 47 выпадкаў каранавіруса. Урад прыняў рашэньне закрыць навучальныя ўстановы і прыпыніць масавыя мерапрыемствы.
Беларускі з Гданьску і Кракава расказваюць, як у суседняй краіне супрацьстаяць пандэміі.
Ад каранавірусу выздаравелі чатыры чалавекі ў Беларусі. Адзін хворы — у «стане сярэдняй ступені цяжкасьці»
Міністар здароўя Беларусі расказаў дзяржаўнаму тэлеканалу СТВ, што па стане на 12 сакавіка ў Беларусі ўжо ў чатырох пацыентаў, у якіх выяўлялі COVID-19, тэсты цяпер далі адмоўныя вынікі.
Каранік адзначыў, што «былі выпадкі», калі людзі ўтойвалі, што езьдзілі ў раёны ўспышак каранавірусу і позна зьвярталіся да мэдыкаў. Колькі такіх выпадкаў было, ён не назваў, але згадаў адзін.
Той пацыент, якога ў Менску шпіталізавалі 9 сакавіка, быў «у ня вельмі добрым стане, у стане сярэдняй ступені цяжкасьці», кажа Каранік. І ён утойваў і ад дзяржаўных службоўцаў, і ад супрацоўнікаў прыватнага мэдычнага цэнтру «ЛОДЭ», што быў у Паўночнай Італіі, дзе фіксавалі ўспышку COVID-19 (утаіць удалося, бо ляцеў празь нямецкі Мюнхэн).
Вільня на пяць тыдняў закрывае дзіцячыя сады і школы
Віленскае гарадзкое самакіраваньне закрывае на пяць тыдняў усе адукацыйныя ўстановы і публічныя забаўляльныя месцы, паведамляе партал DELFI.
Мэрыя паведаміла, што, па ўказаньні кіраўніка адміністрацыі Павіласа Падзярскіса, ў чацьвер было вырашана спыніць усе мерапрыемствы ў закрытых памяшканьнях, у якіх удзельнічае больш за 100 чалавек. Таксама зь пятніцы будзе спыненая праца сталічных музэяў, кінатэатраў, спартклюбаў і іншых месцаў. З заўтрашняга дня да канца велікодных вакацый усе агульнаадукацыйныя ўстановы ў літоўскай сталіцы будуць зачыненыя — дзіцячыя садкі, школы, унівэрсытэты, адмяняюцца ўсе мерапрыемствы.