Ганну Шпак зь Менскага раёна асудзілі за «садзейнічаньне экстрэмісцкай дзейнасьці» (ч. 1 і ч. 2 арт. 361‑4 КК) па «справе Гаюна», піша «Наша Ніва».
Паводле інфармацыі праваабаронцаў «Вясны», ёй прызначылі пазбаўленьне волі ў калёніі ва ўмовах агульнага рэжыму, але на які тэрмін — невядома.
У «сьпісе экстрэмістаў», які вядзе МУС, яе статус пазначаны як «адбывае пакараньне». Гэта значыць, што чалавеку прысудзілі або хімію з накіраваньнем, або калёнію.
Палітзьняволенай Ганьне Шпак 28 гадоў. Родам яна з Горадзеншчыны. У апошнія гады жыла ў вёсцы Ваўчковічы Менскага раёна. Зь дзяцінства займалася лёгкай атлетыкай, скокамі з шастом, была ў складзе нацыянальнай каманды па летніх відах спорту.
У 2014 годзе Ганна ўдзельнічала ў II летніх юнацкіх Алімпійскіх гульнях, дзе скокнула на 3.80 і заняла 4‑е месца ў агульным заліку. Атрымлівала імянную стыпэндыю ад Нацыянальнага алімпійскага камітэта, піша «Наша Ніва».
Форум