Паводле Джэймса Апатурай, забойства Папэргэра, якое сарвалі службы выведкі ЗША і Нямеччыны, было часткай расейскага пляну па ліквідацыі кіраўнікоў абаронных прадпрыемстваў па ўсёй Эўропе.
«За апошнія пару гадоў мы былі сьведкамі выпадкаў сабатажу ў краінах NATO, такіх як сход цягнікоў з рэек, падпалы, напады на маёмасьць палітыкаў, а таксама змовы з мэтай забойства лідэраў галіны, як, напрыклад, выпадак з кіраўніком Rheinmetall. Аднак былі і іншыя змовы», — заявіў Апатурай.
Чыноўнік адзначыў, што Расея вэрбуе людзей для такіх апэрацый праз інтэрнэт. Выканаўцамі, паводле яго, часта становяцца «злачынныя групоўкі, моладзь, якая нічога не падазрае, або мігранты».
Аб тым, што Расея рыхтавала замах на Папэргэра, у ліпені 2024 году паведаміла СNN са спасылкай на пецярых амэрыканскіх і заходніх чыноўнікаў. Паводле іх, пра пляны расейскіх уладаў спачатку даведаліся ЗША, а потым амэрыканская выведка паведаміла пра гэта калегам зь Нямеччыны, якія змаглі абараніць Папэргэра.
Rheinmetall — найбуйнейшы ў Нямеччыне канцэрн па вытворчасьці зброі і вайсковай тэхнікі, якую пастаўляюць у тым ліку Ўкраіне. Кампанія адкрывае ва Ўкраіне завод па вытворчасьці і рамонце бронятэхнікі, а таксама плянуе пабудаваць яшчэ некалькі заводаў, у прыватнасьці прадпрыемства па вытворчасьці артылерыйскіх снарадаў.
ГЛЯДЗІЦЕ ТАКСАМА: CNN: ЗША і Нямеччына сарвалі плян Расеі забіць кіраўніка канцэрну Rheinmetall, які пастаўляе зброю Ўкраіне