Яшчэ да ўрачыстай цырымоніі адкрыцьця там запрацавала выстава мастачкі Кацярыны Еўдакімавай па матывах кнігі «Слон» Сашы Філіпенкі.
Фрагмэнт выставы Кацярыны Еўдакімавай
Фрагмэнт выставы Кацярыны Еўдакімавай
А ў вечаровай праграме пятніцы —
- прэзэнтацыя альманаха «CTRL+S»,
- дыскусія творцаў пра беларускую сучасную прозу і
- канцэрт традыцыйнай габрэйскай народнай музыкі ў выкананьні літоўскага гурта Rakija Klezmer Band.
Чацьвёрты год запар «Прадмова» праходзіць у Вільні. На цырымоніі адкрыцьця выступоўцы з гонарам казалі, што за чарговы «прадмоўны» цыкль беларускіх кніг стала больш, хаця праблем, зьвязаных зь іх напісаньнем, друкам і продажам, не паменела. Прэс-сакратар Саюзу беларускіх пісьменьнікаў Ціхан Чарнякевіч назваў перамогай правядзеньне новай «Прадмовы», бо фэстываль стымулюе творчых беларусаў ствараць сваё.
Ціхан Чарнякевіч
«Мы пачынаем фэстываль, а сюды ў Вільню яшчэ даяжджаюць аўтары, яшчэ ў дарозе выдаўцы з новымі кнігамі — Андрэй Янушкевіч і Ігар Логвінаў. Яшчэ перасякаюць мяжу літаратары зь Беларусі, імёны якіх мы агучыць з пэўных прычын ня можам. Але выдатна, што мы ўсе зноў тут зьбяромся, прастора „Прадмовы“ пашыраецца», — сказаў на адкрыцьці Ціхан Чарнякевіч.
Падчас «Прадмовы» адбудзецца больш за 40 імпрэзаў на двух пляцоўках
11 кастрычніка аб 11 гадзіне праграму сустрэч у клюбе «Paviljonas» адкрые прэзентацыя зборніка вершаў Алеся Аркуша «Чаму праўда такая слабая?»
Далей, з крокам прыкладна ў 40 хвілін пройдзе 14 мерапрыемстваў:
- прэзэнтацыі пяці новых кніг і перавыданьня кнігі Зьмітра Бартосіка «Забіць упалмінзага»,
- дыскусіі творцаў з крытыкамі,
- сустрэчы з аўтарамі, у тым ліку з Макарам, аўтарам «Апошняга пакаленьня».
Сярод беларускамоўных навінак літоўскай літаратуры, зь якімі пазнаёмяць наведнікаў «Прадмовы», будзе раман Крысьціны Сабаляўскайце «Silva rerum» у перакладзе Сяргея Шупы.
А ўвечары ў Беларускім доме наведнікаў чакае спэктакль «Сумны суп» па творах Вольгі Гапеевай у пастаноўцы тэатру «Прыехалі».
Выступ хору на адкрыцьці
Насычанай будзе праграма фэстывалю і ў нядзелю
12 кастрычніка ў Беларускім доме і клюбе «Paviljonas» заплянавана 19 мерапрыемстваў.
У гэты дзень на «Прадмове» пройдуць прэзэнтацыі і абмеркаваньні твораў Андрэя Масквіна, Арцёма Шуканава, Аляксандра Смаленчука, Вольгі Такарчук.
Свае кнігі прэзэнтуе былы палітвязень Уладзімер Мацкевіч.
Таксама сярод імёнаў удзельнікаў — творцы, зьвязаныя са «Свабодай». У другой палове дня наведнікаў фэстывалю чакае дыскусія з аўтарам кнігі пра ножны шпурляк Арцёмам Сізінцавым. Бліжэй да вечара перавыданьне кнігі «Майстроўня. Гісторыя аднаго цуду» прэзэнтуюць яе аўтар Сяргей Дубавец і героі кнігі Вінцук Вячорка, Сяргей Харэўскі і Сяргей Шупа.
Паэт Андрэй Хадановіч
Апошнім мерапрыемствам фэстывалю стане ноч паэзіі. Арганізатары запэўніваюць, што свае вершы змогуць прачытаць і аўтары-наведнікі «Прадмовы».
Цалкам з праграмай «Прадмовы» можна пазнаёміцца тут.
Кніжны кірмаш на «Прадмове» будзе працаваць 11 і 12 кастрычніка ў клюбе «Paviljonas».
ГЛЯДЗІЦЕ ТАКСАМА: «Лукашэнка — Гітлер, які ня змог зьехаць з Аўстрыі». Філіпенка пра забароненыя кнігі і лёс Беларусі