У панядзелак урад Расеі ўхваліў законапраект, які дазволіць прэзыдэнту краіны выкарыстоўваць рэзэрвістаў без абвяшчэньня ваеннага становішча і мабілізацыі ў «контратэрарыстычных апэрацыях» і ваенных канфліктах, у тым ліку за мяжой. Пра гэта паведамілі «Интерфакс» і РБК са спасылкай на свае крыніцы.
Гэта дазволіць задзейнічаць для патрэбаў расейскай арміі да 2 мільёнаў чалавек, паведаміў каналу RTVI першы намесьнік старшыні камітэту па абароне расейскай Дзяржаўнай думы Аляксей Жураўлёў.
«Мы ж вядзем самыя сапраўдныя і вельмі маштабныя баявыя дзеянні, але пры гэтым афіцыйна вайна не абвешчана. І гэтыя юрыдычныя тонкасьці абмяжоўвалі магчымасьць для манэўру для Мінабароны, цяпер яны ліквідаваны», — сказаў дэпутат.
Гаворка ідзе пра людзей, якія «добраахвотна служылі ў войску», атрымліваючы за гэта розныя выплаты і льготы, а цяпер знаходзяцца ў рэзэрве, таксама атрымліваючы за гэта грашовыя даплаты і льготы. Гэтых людзей будуць прыцягваць «у значна большай колькасьці выпадкаў, чым раней», і гэта «цалкам нармальна, асабліва ўлічваючы сытуацыю, у якой цяпер знаходзіцца наша краіна», падкрэсьліў Жураўлёў.
Згодна з законапраектам, для рэзэрвістаў будуць праходзіць «спэцыяльныя зборы» для выкананьня «задач у галіне абароны» тэрмінам ня больш за 2 месяцы, у тым ліку па-за межамі Расеі. Цяпер рэзэрвістаў у Расеі афіцыйна можна выкарыстоўваць толькі падчас мабілізацыі, а ня ў мірны час.
ГЛЯДЗІЦЕ ТАКСАМА: Эстонія часова зачыніла памежную дарогу пасьля расейскай правакацыі з жаўнерамі ГЛЯДЗІЦЕ ТАКСАМА: У анэксаваным Расеяй Крыме гараць нафтабаза і электрападстанцыя. Расейскія войскі атакавалі Адэскую вобласьць і памежжа