Тацяна Астрэйка, выступаючы ў дыскусіі аб міграцыі на ІІІ Менскай міжнароднай канфэрэнцыі ў пытаньнях эўразійскай бясьпекі, заявіла, што ў Беларусі рэкордна нізкі ўзровень беспрацоўя — 2,4%. І гэта пры дастаткова высокім узроўні занятасьці насельніцтва, перадае ейныя словы БелТА. У самай прадуктыўнай узроставай групе 25–49 гадоў ён дасягнуў пікавых значэньняў — каля 95–96%, што сьведчыць аб значным выкарыстаньні ўнутраных працоўных рэсурсаў.
Астрэйка адзначыла, што іншаземцы ўсё часьцей выбіраюць для працаўладкаваньня Беларусь. Цяпер у краіне працуюць 32 тысячы працоўных мігрантаў, што ў паўтара раза больш, чым год таму.
У сярэднім доля працоўных мігрантаў у структуры занятага насельніцтва краіны складае менш за 1%. Геаграфія краін — донараў замежнай працоўнай сілы шырокая і ўключае каля 114 краін, але больш за палову мігрантаў — грамадзяне Туркмэністану і Ўзбэкістану.
Тлумачачы, чаму найбольш іншаземных працоўных мігрантаў працуюць у Менску і Менскай вобласьці, Тацяна Астрэйка зьвярнула ўвагу на заканамернасьць: чым вышэйшы дэфіцыт кадраў, тым больш занятых мігрантаў. Рабочыя прафэсіі найбольш цэняцца. Цяпер у Беларусі на рынку працы назіраецца дэфіцыт адмыслоўцаў рабочых прафэсій, і ён закрываецца за кошт прыцягненьня іншаземцаў.
70% працоўных мігрантаў з-за мяжы занятыя ў рабочых прафэсіях.
ГЛЯДЗІЦЕ ТАКСАМА: Працоўныя мігранты з Пакістану будуць падпісваць абавязацельства ня ўдзельнічаць у нелегальнай міграцыі