У праваабарончым цэнтры «Вясна» паведамілі, што Міністэрства ўнутраных спраў Беларусі дапоўніла пералік грамадзян Беларусі, замежных грамадзян або асоб без грамадзянства, якія маюць дачыненьне да «экстрэмісцкай дзейнасьці».
Паводле праваабаронцаў, 13 з 15 дададзеных чалавек былі абвінавачаныя ці асуджаныя паводле арт. 361-4 КК (садзейнічаньне экстрэмісцкай дзейнасьці).
Сярод іх — адвакатка Сьцяпана Латыпава Кацярына Жаўтанога. Яна адбывае пакараньне.
Апроч таго, «экстрэмісцкімі» прызналі сацыяльныя сеткі стрымэра Мэлстроя. Згодна з рашэньнем суда Цэнтральнага раёна Менску ад 4 лістапада, пад забарону трапілі «рэсурсы, лягатыпы і знакі» стрымэра.
Паведамляецца, што гэта зрабілі праз хуліганства, парушэньні грамадзкага парадку і правакацыі, якіх стала больш і да якіх нібыта заклікаў Мелстрой, абяцаючы грашовую ўзнагароду.
ГЛЯДЗІЦЕ ТАКСАМА: Хроніка перасьледу 4 лістапада: інжынэра зь Берасьця асудзілі ў палітычнай крымінальнай справе