Сытуацыя ў сьвеце на раніцу 3 траўня
- На раніцу 3 траўня ў сьвеце зафіксавалі 3,48 мільёна выпадкаў COVID-19: звыш 1,16 млн у ЗША, 245 тысяч у Гішпаніі, звыш 209 тысяч у Італіі, 182 тысячы ў Вялікай Брытаніі, 168 тысяч ў Францыі, 164 тысячы ў Нямеччыне, 124 тысячы ў Турэччыне, 124 тысячы ў Расеі.
- Ад хваробаў, якія выклікаў новы каранавірус, у сьвеце памерлі 244,791 чалавек. Зь іх 67 448 у ЗША, 28 710 у Італіі, 28,131 у Вялікай Брытаніі, 25,100 у Гішпаніі, 24,760 у Францыі... 4633 у Кітаі.
- Выпісалі звыш 1,12 мільёна пацыентаў, якіх вылекавалі ад COVID-19. «Актыўных выпадкаў» хваробы застаецца звыш 2,1 млн, зь іх каля 51 тысячы ў цяжкім ці крытычным стане.
- У Беларусі, паводле афіцыйных зьвестак на 2 траўня, пацьверджаныя 15 828 выпадкаў COVID-19 (плюс 911 за дзень). Ад каранавірусу ў Беларусі прызналі сьмерць 97 чалавек (плюс 4 за дзень), выпісалі здаровымі 3117 пацыентаў.
Над Вашынгтонам прайшоў авіяпарад у гонар тых, хто змагаецца з каранавірусам
Пілятажныя групы ваенна-паветраных сіл ЗША «Буравесьнікі» і ваенна-марскіх сіл ЗША «Блакітныя анёлы» правялі ў суботу паветраны парад над Вашынгтонам у гонар людзей, якія знаходзяцца на перадавой барацьбы з пандэміяй каранавірусу, паведамляе «Голос Америки».
Самалёты ВПС і ВМС таксама праляцелі над Балтыморам — найбуйнейшым горадам штата Мэрылэнд і над штатам Вірджынія, а затым над Атлянтай — сталіцай штата Джорджыя.
На раніцу 3 траўня ў ЗША зафіксавалі 1,16 млн выпадкаў COVID-19. Звыш 67 тысяч чалавек памерлі, сярод іх прынамсі 27 мэдыкаў.
Качанава: Рашэньне ня ўводзіць карантын было «абсалютна правільным»
Захады, якія робяцца ў Беларусі ў сувязі з распаўсюдам каранавіруснай інфэкцыі, адэкватныя сытуацыі. Пра гэта заявіла сьпікер Савета Рэспублікі, былая кіраўніца Адміністрацыі прэзыдэнта Натальля Качанава 2 траўня ў эфіры перадачы «Ток-шоу АТН» на тэлеканале «Беларусь 1».
Паводле яе слоў, «абсалютна ўсе рашэньні, якія цяпер прымаюцца ў краіне, будуць працаваць на пэрспэктыву».
«Рашэньне пра тое, што Беларусь ня будзе закрываць межы, як іншыя краіны, не было простым, і яно ніяк не прымалася спантанна, — сказала Качанава. — Калі камусьці здаецца, што мы вырашылі пайсьці супраць усіх, то гэта абсалютна няправільна. Рашэньні дакладна вывераныя, і калі прэзыдэнту на стол паклалі даклад пра сытуацыю, якая складваецца і пра тое, як яна можа разьвівацца (гэта ж ўсё пралічваецца: у нас ёсьць адмыслоўцы, навукоўцы, лекары-інфэкцыяністы, ёсьць распрацаваны плян дзеяньняў), прэзыдэнт убачыў, што ўсе абсалютна правільна, жыцьцё не павінна спыняцца. А што пасьля пандэміі, што пасьля эпідэміі? Як будуць працаваць галіны, на што будуць жыць людзі? Гэта рашэньне, хоць і вельмі няпростае, але жыцьцё паказала, што выверанае, пралічанае, тое, якое сёньня дае вынік».
Як лічыць Качанава, у Беларусі ёсьць усё, каб супрацьстаяць каранавірусу.
«Я лічу, што захады, якія прымаюцца сёньня ў нашай краіне, адэкватныя сытуацыі. Тут галоўнае — наяўнасьць мэдыцынскага абсталяваньня, лекавых прэпаратаў, лекараў, якія павінны лячыць, і месцаў ў бальніцах. Гэта ўсё ў нас ёсьць і знаходзіцца на вельмі жорсткім кантролі ў Міністэрстве аховы здароўя», — падкрэсьліла Качанава.
Прэс-сакратар Лукашэнкі расказала, ці здаваў ён тэст на каранавірус і як прымае рашэньні
Кіраўнік Беларусі Аляксандр Лукашэнка дагэтуль не здаваў тэст на каранавірус. Пра гэта падчас ток-шоў на тэлеканале «Беларусь 1» паведаміла ягоны прэс-сакратар Натальля Эйсмант, паведамляе БелТА.
«Я ўжо недзе гэта камэнтавала. У гэтым няма ніякай неабходнасьці», — заявіла прэс-сакратар кіраўніка дзяржавы.
Яна адзначыла, што «ўсе ведаюць пра тое, што Лукашэнка жыве за горадам, за многія гады не мяняў сваіх звычак, вядзе здаровы лад жыцьця, у яго моцны імунітэт, і кіраўнік дзяржавы добра сябе адчувае».
Камэнтуючы мэханізм прыняцьця рашэньняў па рэагаваньні на разьвіцьцё сытуацыі з каранавірусам у краіне, Эйсмант зьвярнула ўвагу, што ў кожнай вобласьці арганізаваныя штабы. У іх прымаюць удзел прадстаўнікі сыстэмы аховы здароўя і ўлады — ад старшыняў райвыканкамаў да вышэйшых службовых асоб.
«Яны ўсё па ланцугу абменьваюцца інфармацыяй. Гэтая інфармацыя акумулюецца і з розных крыніц паступае прэзыдэнту. Тут ніхто нікога не падмяняе. Проста для таго, каб інфармацыя была поўнай і ўсёабдымнай, яна павінна ісьці з розных крыніц, — сказала яна. — Прэзыдэнт праводзіць шматгадзінныя тэлефонныя размовы кожны дзень, без выхадных, раніцай і ўвечары. Інфармацыя ідзе проста патокам. Толькі пасьля збору ўсёй інфармацыі прымаюцца рашэньні».
У Расеі за суткі зафіксавалі рэкордныя 10633 новыя выпадкі COVID-19
Памерлі за той жа пэрыяд 58 чалавек, як паведамляюць у нядзелю ў апэратыўным штабе па барацьбе з распаўсюджваньнем каранавіруса.
Агульная колькасьць ахвяр COVID-19 узрасла ў Расіі да 1280, колькасьць хворых складае цяпер 134 687 чалавек — сёмае месца ў сьвеце.
У расейскай арміі і ваенных навучальных установах з сакавіка па 2 мая заразіліся каранавірусам 2,6 тысячы чалавек, паведамляе РБК са спасылкай на бюлетэнь Мінабароны. Першае тэставаньне паказала заражэньне прыкладна 200 выхаванцаў ваенных вучэльняў.
Ваенныя мэдыкі знайшлі каранавірус у 1177 вайскоўцаў у арміі і ў 1195 курсантаў у ВНУ Мінабароны Расіі. Сярод грамадзянскага пэрсаналу Ўзброеных сіл больш за 320 інфікаваных.
Лукашэнка: «Сёньня атрымліваецца стрымліваць захворваньне ў цэлым»
У нядзелю, 3 траўня на нарадзе ў прэзыдэнта Беларусі Аляксандра Лукашэнкі абмяркоўваюць імпрэзы да Дня Перамогі і эпідэміялягічную сытуацыю ў краіне, паведамляе БелТА.
«На сёньняшні дзень атрымоўваецца стрымліваць захворваньне ў цэлым. Што тычыцца інфэкцыйных захворваньняў, то мы ідзем выразна ў тым прагнозе, які быў два месяцы таму дакладзены мне», — заявіў кіраўнік дзяржавы.
Аляксандр Лукашэнка вобразна адзначыў, што [савецкае] войска 41-га года і армія 45-га — гэта дзьве розныя арміі, падкрэсьліўшы, што сыстэма аховы здароўя, дактары ў Беларусі ўжо атрымалі неабходны вопыт лячэньня хворых.
«Я гляджу кожныя суткі інфармацыю. Сёньня атрымаў. Па пнэўманіі, што я вельмі кантралюю, занятыя ўсяго 10% ад наяўнасьці апаратаў. У нас сёньня на ШВЛ крыху больш за 200 чалавек. А апаратаў ШВЛ — 2,5 тысячы плюс паўтысячы наркозна-дыхальных, калі гэта трэба будзе», — сказаў кіраўнік дзяржавы.
Лукашэнка падкрэсьліў, што сёньня галоўнае — гэта лячэньне людзей.
«Аналізуючы ўсю сытуацыю, нам асаблівую ўвагу, што мы сёньня і робім, трэба зьвярнуць на пнэўманіі. Галоўнае для нас сёньня — гэта лячэньне людзей — пнэўманіі. Прашу гэта мець на ўвазе. Для мяне гэта пытаньне нумар адзін. І я вельмі сур’ёзна кантралюю гэтыя працэсы», — заявіў кіраўнік Беларусі.
Паводле яго словаў, у Беларусі вырашаны ўсе пытаньні, зьвязаныя ня толькі з бясьпекай лекараў у шпіталях, але і на іншых узроўнях.
«Лекаў у нас хапае. Прытым для лячэньня самымі сучаснымі новымі спосабамі. Сёньня атрымліваецца стрымліваць захворваньне ў цэлым. Што тычыцца інфэкцыйных захворваньняў, то мы ідзем дакладна ў тым прагнозе, які быў два месяцы таму дакладзены мне», — заявіў кіраўнік дзяржавы.
Згарэлі 218, патанулі 89. Лукашэнка параўнаў колькасьць сьмерцяў ад каранавірусу і ў здарэньнях
На нарадзе ў Лукашэнкі 3 траўня адзначылі, што па стане на 2 траўня ў Беларусі зафіксавана 97 сьмерцяў пацыентаў з COVID-19. Пры гэтым за прамінулы пэрыяд 2020 году ад хваробаў сыстэмы крывазвароту памерлі амаль 25 тысяч чалавек, ад анкалёгіі — прыкладна 6,4 тысячы.
«Але што мяне ўразіла — ад атручваньня алькаголем памерлі 482 чалавекі. Самагубстваў — 470. Ужо амаль 1 тысяча чалавек загінула ад алькаголю і самагубстваў. На пажарах загінулі 218 чалавек. На дарогах за 4 месяцы ў аварыях загінулі 163 чалавекі. Патанулі 89 чалавек — амаль столькі, колькі ад рознага роду хваробаў, абцяжараных COVID-19», — прывёў статыстыку Аляксандар Лукашэнка.
Лукашэнка: «Мы ня можам адмяніць парад»
Падчас нядзельнай нарады 3 траўня Аляксандр Лукашэнка адзначыў, што пакуль ня мае намеру мяняць плян імпрэзаў да Дня Перамогі, які быў прадстаўлены даўно.
Лукашэнка падкрэсьліў глыбокае ідэалягічнае і эмацыянальнае значэньне параду ў гонар 75-годзьдзя Перамогі.
«Павінен сказаць, што мы ня можам адмяніць парад. Проста ня можам. Я доўга над гэтым думаў. Вядома, гэта эмацыйная, глыбока ідэалягічная рэч. Трэба памятаць, што тыя людзі паміралі, можа быць, і ад вірусаў, іншых хваробаў. Але яны гэта не адчувалі часам, і пра гэта ня думалі. І паміралі яны дзеля нас, як бы гэта пафасна ні гучала», — заявіў Лукашэнка на нарадзе.
Брытанскі прэм’ер расказаў, як хварэў на COVID-19: «Лекары рыхтаваліся да горшага»
Прэмʼер-міністар Вялікай Брытаніі Борыс Джонсан, які перанёс каранавірусную інфэкцыю і нядаўна вярнуўся да працы, у інтэрвію The Sun распавёў падрабязнасьці аб ходзе сваёй хваробы і пацьвердзіў, што лекары асьцерагаліся сьмяротнага зыходу.
Па словах Джонсана, калі стан яго здароўя пагоршыўся, яго акружэньню прыйшлося рыхтаваць пляны на выпадак, як ён выказаўся, «сцэнара, падобнага „Сьмерці Сталіна“» — маючы на ўвазе сатырычны фільм рэжысэра Арманда Янучы пра сьмерць савецкага правадыра. Лекары, як сказаў брытанскі прэмʼер, рыхтаваліся да горшага. Ўсурʼёз абмяркоўвалася магчымасьць яго падлучэньня да апарата штучнай вэнтыляцыі лёгкіх — у нейкі момант, па словах прэмʼера, верагоднасьць гэтага была 50 на 50.
Джонсан распавёў, што з цягам хваробы ўсё больш падаў духам: «Я не разумеў, чаму мне не становіцца лепш». У рэшце рэшт, Джонсана шпіталізавалі.
«Мне на твар надзелі кіслародную маску і пачалі падаваць мне многія літры кіслароду». Ўсю сурʼёзнасьць сытуацыі ён усьвядоміў, калі яго падключылі да манітораў, і яны паказалі, што яго стан па-ранейшаму пагаршаецца. Тады прэмʼера перавялі ў аддзяленьне інтэнсіўнай тэрапіі.
«Увесь гэты час я думаў пра тое, ці ўдасца мне выбрацца. Я зразумеў, што ад каранавіруснай інфэкцыі няма лекаў».
У рэшце рэшт, стан Джонсана стаў паляпшацца. Ён прызнаецца, што дакладна ня ведае, што менавіта стала прычынай паляпшэньня.
877 новых выпадкаў за суткі. Мінздароўя апублікавала новыя лічбы эпідэміі ў Беларусі
Міністэрства аховы здароўя Беларусі агучыла дадзеныя распаўсюду каранавіруснай інфэкцыі паводле стану на 3 траўня.
- Згодна са статыстыкай ведамства, зарэгістравана 16 705 чалавек са станоўчым тэстам на COVID-19, што складае 8,1% ад праведзеных тэстаў. Прырост за суткі склаў 877 выпадкаў.
- Колькасьць памерлых дасягнула 99 чалавек, напярэдадні гэтая лічба была 97.
- Выпісаныя са шпіталёў, паводле Міністэрства аховы здароўя, 3196 пацыентаў з раней пацьверджаным дыягназам COVID-19.
- Агулам праведзена 204 239 тэстаў.
Памёр 36-гадовы супрацоўнік шпіталя ў Буда-Кашалёве — пнэўманія і каранавірус
1 траўня ў гомельскім сухотным шпіталі памёр 36-гадовы супрацоўнік буда-кашалёўскага шпіталя Вадзім М. Ён працаваў інжынэрам-праграмістам. Гэтую інфармацыю пацьвердзілі Свабодзе сваячка і калегі памерлага.
23 красавіка мужчыну перавезьлі ў цяжкім стане з буда-кашалёўскага шпіталя ў Гомель, адкуль ён паходзіў. У гомельскім шпіталі ён ляжаў пад апаратам штучнай вэнтыляцыі лёгкіх. Паводле сваякоў, у яго была двухбаковая пнэўманія і пацьвердзіўся каранавірус.
Яго ня стала 1 траўня. Пахаваньне мае адбыцца 3 траўня.
Вадзім ня быў жанаты, жыў у інтэрнаце для мэдыкаў у Буда-Кашалёве. У яго засталіся бацькі і брат у Гомлі.
У райцэнтры Буда-Кашалёве — успышка каранавірусу. Раней Свабода пісала пра сьмерць 45-гадовай мэдсястры тамтэйшай хуткай дапамогі Галіны Н. Захварэлі мэдыкі, у тым ліку лекары тэрапіі і рэанімацыі, а таксама пацыенты тэрапэўтычнага аддзяленьня раённай лякарні.
Пампэо заявіў пра «агромністыя доказы» таго, што новы каранавірус зьявіўся ў лябараторыі ў Кітаі
Дзяржсакратар ЗША Майк Пампэо заявіў у інтэрвію тэлеканалу ABC News у нядзелю пра існаваньне «агромністых доказаў» таго, што новы каранавірус SARS-CoV-2 паходзіць зь лябараторыі ў кітайскім Ухані.
«Гэта ня першы раз, калі сьвет сутыкаецца зь вірусамі ў выніку правалаў у кітайскай лябараторыі», – сказаў ён.
Лічбы на раніцу 4 траўня
- У сьвеце зафіксавалі звыш 3,56 мільёна выпадкаў COVID-19: 1,188 млн у ЗША, 247 тысяч у Гішпаніі, звыш 210,5 тысячы ў Італіі, звыш 186,5 тысячы ў Вялікай Брытаніі, звыш 168,5 тысячы ў Францыі, звыш 165,5 тысячы ў Нямеччыне, звыш 134,5 тысячы ў Расеі, 126 тысяч у Турэччыне, амаль 102 тысячы ў Бразыліі.
- Ад хваробаў, якія выклікаў новы каранавірус, у сьвеце памерлі 248 302 чалавекі. Зь іх 68 598 у ЗША, 28 884 у Італіі, 28 446 у Вялікай Брытаніі, 25 264 у Гішпаніі, 24,895 у Францыі.
- Выпісалі звыш 1,154 мільёна пацыентаў, якіх вылекавалі ад COVID-19. «Актыўных выпадкаў» хваробы застаецца звыш 2,163 млн, зь іх каля 50 тысяч у цяжкім ці крытычным стане.
- У Беларусі, паводле афіцыйных зьвестак на 3 траўня, пацьверджаныя 16 705 выпадкаў COVID-19 (плюс 877 за дзень). Ад каранавірусу ў Беларусі прызналі сьмерць 99 чалавек (плюс 2 за дзень), выпісалі здаровымі 3196 пацыентаў.
Аўтарка «Гары Потэра» паправілася ад каранавірусу і ахвяравала мільён фунтаў найбольш уразьлівым падчас пандэміі
Брытанская пісьменьніца Джоан Роўлінг паведаміла, што грошы будуць падзеленыя паміж дзьвюма дабрачыннымі арганізацыямі, Crisis і Refuge, якія дапамагаюць бяздомным і ахвярам хатняга гвалту адпаведна.
«Як звычайна, у часы такіх крызісаў, больш за ўсё цярпяць найбольш бедныя і ўразьлівыя», — напісала яна ў «Твітэры».
Месяц таму 54-гадовая Роўлінг паведаміла, што ачуняла пасьля меркаванага выпадку COVID-19, прахварэўшы два тыдні.
Міністар здароўя Каранік абяцаў «перадышку» лекарам у Віцебску
На нарадзе ў Аляксандра Лукашэнкі 3 траўня міністар здароўя Беларусі Ўладзімер Каранік расказаў пра пляны даць адпачынак пэрсаналу віцебскіх лякарняў.
Лукашэнка адзначыў, што цяпер трэба падтрымаць лекараў, каб яны «разгружаліся больш», а тое «з гэтымі ковіднымі [...] круцяцца дзень і ноч».
«Сытуацыя ў Віцебску ўжо дазваляе плянаваць, што паэтапна ўжо з гэтых выходных лякарні па адной будуць выводзіць з аказаньня мэдычнай дапамогі, праводзіцца поўная дэзынфэкцыя, цягам тыдню перасартаваньне…» — пачаў казаць міністар, ды Лукашэнка яго перабіў.
Кіраўнік дзяржавы сказаў міністру, што пачынае перажываць, калі той кажа пра гэта, бо «Віцебск так ужо насьцярожыў людзей», што ад словаў пра вывядзеньне арганізацыяў і людзей «з сыстэмы» ён пачынае «перажываць больш, чым за хворых».
Міністар растлумачыў: лякарні плянуюць «выводзяць з бою» на тыдзень, «прыводзіць у парадак», «даць адпачынак пэрсаналу, каб яны ўжо маглі рэгіёнам дапамагаць». Пачуўшы гэта, Лукашэнка пагадзіўся: «Ну правільна, трэба дапамагаць».
Прэзыдэнт Сэрбіі анансаваў заканчэньне надзвычайнага становішча
У Сэрбіі надзвычайнае становішча, уведзенае ў сувязі з пандэміяй каранавірусу, перастане дзейнічаць на гэтым тыдні, бо колькасьць новых выпадкаў інфэкцыі значна запаволілася, заявіў прэзыдэнт краіны Аляксандар Вучыч.
Прыпыненьне надзвычайнага становішча, пры якім межы і аэрапорты ў краіне былі закрытыя, а свабода перамяшчэньня жыхароў была абмежаваная, мусіць ратыфікаваць парлямэнт у сераду, абвясьціў прэзыдэнт Сэрбіі. Ён дадаў, што ўсе ўмовы выкананыя.
На сёньняшні дзень у Сэрбіі было выяўлена 9464 выпадкі каранавіруснай інфэкцыі (каля 1083 выпадкаў на мільён чалавек), 193 чалавекі памерлі ад COVID-19. Аднак у апошнія дні вірусная інфэкцыя выяўляецца менш чым у 5% з тысяч людзей, якія штодня здаюць тэсты на вірус.
У Літве зьмякчылі ўмовы карантыну: яе жыхары могуць выяжджаць за мяжу
Урад Літвы зьмякчыў некаторыя правілы карантыну, ад панядзелка жыхары могуць пакідаць тэрыторыю краіны, паведамляе агенцтва BNS.
Ад 16 сакавіка зь Літвы маглі выехаць толькі тыя, хто працуе ці жыве за мяжой. З пачатку карантыну да цяперашняга часу памежнікі не далі выехаць з краіны больш чым 500 жыхарам.
На гэты момант суседнія зь Літвой Польшча і Расея замежнікаў не пускаюць, але Беларусь і Латвія дазваляюць ўезд замежнікаў.
У Беларусь можна трапіць праз КПП Меднікі-Каменны Лог, Салечнікі-Беняконі і Райгардас-Прывалка. У Латвію зь Літвы можна выехаць праз КПП Буцінге-Руцава, Салочай-Грэнстале і Сьмеліне-Мэдумі.
З сёньняшняга дня ў Польшчы адкрытыя гандлёвыя цэнтры і гасьцініцы
З сёньняшняга дня ў Польшчы адкрытыя гандлёвыя цэнтры, рэабілітацыйныя ўстановы, бібліятэкі, музэі і галерэі мастацтва.
Варшава здымае чарговыя абмежаваньні, уведзеныя некалькі тыдняў таму ў сувязі з эпідэміяй каранавіруса. Аб’екты адкрываюцца пры адной важнай умове: у разьліку на 15 квадратных мэтраў павінен знаходзіцца адзін кліент. Абмежаваньні здымаюцца пры ўмове захаваньня жорсткіх санітарных нормаў. У сваю чаргу 6 траўня будуць адкрытыя дзіцячыя садкі і ясьлі.
Таксама сёньня ўзноўленыя некаторыя чыгуначныя маршруты паміж польскімі гарадамі. Надалей ня езьдзяць цягнікі ў міжнародным паведамленьні.
Італьянская вакцына ад каранавірусу пасьпяхова прайшла выпрабаваньні на мышах
Вакцына ад каранавірусу, якая распрацоўваецца італьянскай кампаніяй Takis, прадэманстравала сваю эфэктыўнасьць падчас выпрабаваньняў на мышах. Пра гэта ў панядзелак паведаміла агенцтва Ansa са спасылкай на кіраўніцтва кампаніі.
Па дадзеных агенцтва, антыцелы, уведзеныя з вакцынай у арганізм мышэй, заблякавалі разьвіцьцё віруса. Гэтыя выпрабаваньні былі праведзены на базе лябараторыі Нацыянальнага інстытуту інфэкцыйных захворваньняў імя Лядзара Спалянцані ў Рыме.
Як паведамляе агенцтва, выпрабаваньні на людзях пачнуцца не раней за восень.
«Калі лекары вымруць, хто нас будзе лячыць?» Як гарадзенцы ратуюць мэдыкаў у час пандэміі
Дызайнэрка адкладае працу на ноч, каб удзень шыць камбінэзоны. Кіроўцы скідваюцца на рэсьпіратары і бахілы для «хуткай». Студэнтка паміж парамі і працай робіць з адходаў дыванок для дэзынфэкцыі.
Пра тое, як у Горадні аб’ядналіся ў дапамозе мэдыкам, — у публікацыі Свабоды >>