Цягам апошняй прызыўной кампаніі, што пачалася ў сярэдзіне кастрычніка, ува ўсіх рэгіёнах урачыста адпраўлялі ў войска.
У цырымоніях звычайна бралі ўдзел прадстаўнікі раённых уладаў, вайсковыя камісары, прадстаўнікі міліцыі й мясцовых управаў МНС, рэгіянальных арганізацыяў БРСМ, а таксама сьвятары й мясцовыя творчыя калектывы.
Разам з тым у рэгіёнах адбываюцца і менш урачыстыя падзеі, якія можна расцаніць як папярэджваньне маладых людзей наконт правапарушэньняў, у прыватнасьці ўхіленьня ад службы.
Напрыклад, 3 лістапада ў цэнтры сацыяльнага абслугоўваньня насельніцтва Веткаўскага раёну з прызыўнікамі паразмаўлялі старшыня мясцовага суду Вольга Сычова, пракурор раёну Дзьмітры Сініцкі, начальнік мясцовага аддзяленьня Сьледчага камітэту Сяргей Худзякоў, намесьнік начальніка РАУС Дзьмітры Сыравацкі і начальнік асобнай групы вайсковага камісарыяту Добрускага і Веткаўскага раёну Мікалай Харкоў.
«Галоўнай мэтай сустрэчы была прафіляктыка правапарушэньняў у галіне выкананьня абавязкаў вайсковага ўліку і недапушчэньня воінскіх злачынстваў», — паведаміла раённая газэта «Голас Веткаўшчыны».
Улады Беларусі не даюць афіцыйнай статыстыкі фактаў ухіленьня юнакоў ад службы ў войску. Былі выпадкі, калі праваахоўныя органы абвяшчалі іх міжнародны вышук.
Ухіленьне ад арміі ў Беларусі — крымінальнае злачынства, за якое, залежна ад абставінаў, могуць пакараць штрафам, арыштам да шасьці месяцаў, абмежаваньнем ці пазбаўленьнем волі на два гады. У адміністрацыйным парадку караюць за няяўку ў камісарыят без паважлівых прычын.
Форум