У Міністэрстве замежных спраў Беларусі нагадалі пра сваю рэкамэндацыю грамадзянам Беларусі, якія жывуць у Ізраілі і Лібане, «няўхільна выконваць рэкамэндацыі мясцовых уладаў і правілы асабістай бясьпекі», а таксама прапанавалі авіямаршруты, якімі беларусы могуць скарыстацца, каб выехаць з Блізкага Ўсходу.
«Лібан пакінулі ўжо больш за 3 тысячы французаў, звыш 1100 амэрыканцаў, і беларусам МЗС таксама казаў гэтак зрабіць. Але гаварыць не мяшкі варочаць. Таму мы пасядзелі і паглядзелі, як рэальна грамадзянам Беларусі вярнуцца зь Лібану дадому», — паведамляецца ў Telegram-канале «Глас МИДа», які зьвязваюць зь беларускім замежнапалітычным ведамствам.
У прыватнасьці, грамадзянам Беларусі прапанавалі карыстацца рэйсамі рэгіянальных авіякампаній з Бэйруту ў Аман, Стамбул, Дубай, Доху, а адтуль — у Маскву і потым у Менск.
Уласьнікам шэнгенскай візы прапанавалі вяртацца зь Лібану праз эўрапейскія краіны — Францыю, Грэцыю, Нямеччыну ці Данію, адтуль — у Вільню і потым аўтобусам у Менск.
Як іншыя краіны вывозяць сваіх грамадзян з зоны канфлікту
Расея 3 кастрычніка накіравала ў Бэйрут самалёт свайго Міністэрства надзвычайных сытуацый з гуманітарнай дапамогай, а зваротным рэйсам вывезьла 60 сваіх грамадзян, у тым ліку і сем’і сваіх дыпляматаў.
Літва заклікала сваіх грамадзян тэрмінова пакінуць Ізраіль і Лібан і ў пачатку кастрычніка адправіла свой самалёт у Бэйрут. 6 кастрычніка адтуль вывезьлі 18 грамадзян Літвы і 8 грамадзян Латвіі.
Украіна арганізавала тры спэцыяльныя рэйсы, каб вывезьці ня толькі сваіх, а і іншаземных грамадзян — 3 жніўня, а таксама 1 і 9 кастрычніка. Усяго краіна, якая ваюе, эвакувала з краін Блізкага Ўсходу 302 грамадзян, у тым ліку 217 украінцаў і 85 іншаземцаў. Сярод эвакуаваных Украінай — грамадзяне Літвы, Польшчы, Чэхіі, Малдовы, Бразыліі, Лібану, Аргентыны, Мэксыкі, Румыніі і Калюмбіі.
- Пасьля атакі ХАМАС 7 кастрычніка 2023 году Ізраіль пачаў ваенны наступ на Газу. У выніку яго загінулі каля 42 тысяч палестынцаў, сьцьвярджае падкантрольнае ХАМАС Міністэрства аховы здароўя Газы. Каля 90% насельніцтва сэктару Газа было перамешчана, вялікія тэрыторыі былі разбураныя ізраільскімі бамбаваньнямі.
- 7 кастрычніка ізраільскія вайскоўцы заявілі, што за апошні год яны разбамбілі больш за 40 тысяч цэляў у сэктары Газа, выявілі 4700 тунэляў і зьнішчылі 1000 ракетных пускавых установак.
- Канфлікт у Газе ўсё яшчэ працягваецца, у той час як Ізраіль цяпер таксама ваюе на другім фронце на поўдні Лібану супраць «Хэзбалы». У апошнія тыдні Ізраіль наносіў авіяўдары па ўсім Лібане, уключаючы Бэйрут, і арганізаваў наземнае ўварваньне на поўдзень Лібану ў сваім імкненьні зьнішчыць магчымасьці і кіраўніцтва «Хэзбалы».
- Ізраільскія вайскоўцы забілі лідэра «Хэзбалы» Хасана Насралу і, магчыма, яго патэнцыйнага пераемніка Гашэма Сафі ад-Дына.
Вайна Ізраілю з ХАМАСам і «Хэзбалой». Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў. Аднак ужо неўзабаве гэты мірны плян правалілі.
- 8 кастрычніка на пасярэдніцкіх перамовах у Эгіпце два бакі ў чарговы раз дамовіліся пра спыненьне агню. Гэта першая частка годы, распрацаванай адміністрацыяй прэзыдэнта Злучаных Штатаў Дональда Трампа.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.