Прэс-сакратар міністра – каардынатара спэцслужбаў Польшчы Яцэк Дабжыньскі адрэагаваў на словы кіраўніка КДБ Беларусі пра «дыялёг па лініі спэцслужбаў» з Польшчай.
Словы Дабжыньскага перадае польскае выданне Fakt.
«Мне нічога пра гэта не вядома», — сьцісла адказаў прэс-сакратар міністра – каардынатара спэцслужбаў Польшчы Яцэк Дабжыньскі на просьбу пракамэнтаваць словы Івана Тэртэля, сказаныя 14 кастрычніка пасьля нарады ў Лукашэнкі.
Сярод іншага Тэртэль заявіў:
«Вядома ж, адносіны з нашымі суседзямі. Гэта Польшча традыцыйна, гэта Прыбалтыка. Напэўна, ня будзе вялікай таямніцай сказаць, што ў нас ёсьць каналы зносін з нашымі партнэрамі. Гэты дыялёг вядзецца. І ў тым ліку па лініі спэцслужбаў.
Я б сказаў, што разуменьне паміж намі паціху наладжваецца. Мы абмяркоўваем вострыя пытаньні і недзе выходзім на разуменьне ўзаемных інтарэсаў».
«Наш узаемны інтарэс — гэта стабільная сытуацыя ў рэгіёне, дзейная эканоміка, занятасьць людзей. Гэта спакойнае жыцьцё нашых грамадзян з пэрспэктывай на будучыню, адсутнасьць канфліктных сытуацыяў, разрадка ў цэлым той напружанасьці, якая ёсьць і пра якую мы ўсе практычна чуем», — дадаў Тэртэль.
ГЛЯДЗІЦЕ ТАКСАМА: Тэртэль заявіў, што Беларусь у дыялёгу з Польшчай і краінамі Балтыі выходзіць «на разуменьне ўзаемных інтарэсаў»Аляксандар Лукашэнка 14 кастрычніка правёў нараду на тэмы «міжнароднай абстаноўкі і разьвіцьця беларуска-амэрыканскіх дачыненьняў» з удзелам прэм’ера, кіраўніка сваёй адміністрацыі, дзяржаўнага сакратара Савету бясьпекі, генэральнага пракурора і старшыні КДБ.
На нарадзе абмеркавалі «вялікую ўгоду» паміж Беларусьсю і ЗША, і прынцыпы, на якіх улады плянуюць аднавіць дачыненьні з амэрыканскім бокам.
Беларусь сапсавала дачыненьні з усімі сваімі суседзямі пасьля фальсыфікацыі вынікаў выбараў і жорсткага разгону акцыяў пратэсту ў 2020 годзе.
Вясной 2021 году на межах Беларусі з Польшчай, Літвой і Латвіяй пачаўся міграцыйны крызіс, які працягваецца і дагэтуль. Улады суседніх эўрапейскіх дзяржаваў лічаць яго «гібрыднай атакай», арганізаванай рэжымамі ў Менску і Маскве.
Праз вялікую колькасьць спробаў незаконнага перасячэньня мяжы краіны закрылі большую частку памежных пераходаў на мяжы зь Беларусьсю.
Апроч таго, улады Беларусі падтрымалі расейскае ваеннае ўварваньне ва Ўкраіну ў лютым 2022 году.
ГЛЯДЗІЦЕ ТАКСАМА: Кіраўнік расейскай выведкі Нарышкін на сустрэчы з Лукашэнкам выказаў пагрозы на адрас краін Балтыі і Польшчы