«Гэта нейкія правакацыі. Калі камусьці трэба знайсьці падставу, каб сваёй рыторыкай апраўдаць нейкія дзеяньні — супраць Беларусі, супраць Расеі, урэшце і супраць сваіх грамадзян, то і шукаюцца такія падставы», — заявіў міністар замежных справаў Беларусі Максім Рыжанкоў у этэры дзяржаўнага «Першага інфармацыйнага» каналу.
«Тое, што лёталі калісьці гэтыя балёны з кантрабандай нейкіх цыгарэт, — яны ж усё жыцьцё лёталі. Ёсьць такія кантрабандысты, пэўна ж. Але, самае цікавае, што нам ніякіх нотаў не дасылалася. Самі ня могуць разабрацца, што там за балёны лёталі і якія, — яны так і не знайшлі», — сьцьвярджаў Рыжанкоў.
Ён дадаў, што літоўскім уладам трэба найперш разабрацца з тымі, хто «нажываецца» на кантрабандзе ў Літве.
«Вось разьберацеся, пераможаце ў сябе кантрабанду, і ня будзе такіх пытаньняў», — сказаў Рыжанкоў.
Ён адзначыў, што мэта гэтых «правакацыяў» — апраўданьне магчымага закрыцьця транзыту ў Калінінградзкую вобласьць або далейшых абмежаваньняў на пралёт самалётаў: «Маўляў, „вось паглядзіце, якія каля нас барбары, якія незразумела чым займаюцца“».
«Вось для гэтага ўсё і робіцца. То бок, вобразна кажучы, абгрунтаваць свайму народу дзеяньні антыбеларускага, антырасейскага характару цяжка, таму трэба панаскрабаць нейкага нэгатыву, на фоне якога напалоханы жыхар Літвы будзе ў глыбіні душы хоць і перажываць за тое, што нагнятаецца такая сытуацыя, што трэба бегчы шукаць дзесьці нейкае бамбасховішча, запасацца прадуктамі харчаваньня, але будзе падтрымліваць дзеяньні ўладаў, бо „гэта сапраўды пагроза з усходу“», — лічыць Максім Рыжанкоў.
Паводле Рыжанкова, Лукашэнка сёньня падчас сустрэчы з кардыналам Кляўдыё Гуджэроцьці сказаў, што несусьветная дурасьць — «думаць, што Беларусь ці Расея сабраліся ісьці на Парыж, Лёндан ці яшчэ кудысьці».
Форум