У службе аховы дзяржаўнай мяжы Літвы пры міністэрстве ўнутраных спраў у адказ на запыт Свабоды расказалі, колькі ўсяго паветраных шароў з кантрабандай ім удалося перахапіць сёлета зь беларускага боку.
- З пачатку году гэта — 545 шароў з кантрабандай.
- 65 — толькі ў кастрычніку.
- Найбольшую колькасьць шароў памежнікі фіксавалі ў сакавіку — 77.
22 кастрычніка Літва была ў чарговы раз вымушаная закрыць аэрапорт і, часова, мяжу праз шары з боку Беларусі, тады памежнікі перахапілі 13 шароў.
- Агулам, з пачатку году шарамі і дронамі спрабавалі перавезьці кантрабандай 889 тысяч пачкаў цыгарэт, паведамілі ў службе аховы дзяржаўнай мяжы Літвы.
- Адзін паветраны шар, паводле службы аховы дзяржаўнай мяжы Літвы, звычайна нясе каля 1500 пачкаў цыгарэт.
29 кастрычніка літоўскі ўрад прыняў рашэньне закрыць мяжу зь Беларусьсю на месяц. Пункт пропуску ў Медніках (зь беларускага боку Каменны Лог) будзе закрыты з пэўнымі выняткамі, пункт у Салечніках (Беняконі) будзе закрыты цалкам.
Выняткамі ў Медніках будуць:
- дыпляматычныя машыны,
- жыхары Калінінградзкай вобласьці, якія едуць транзытам церазь Літву,
- грамадзяне Літвы і замежнікі з дазволам на жыхарства ў Літве, якія вяртаюцца ў Літву,
- грамадзяне ЭЗ і краінаў NATO і члены іхных сем’яў,
- і з дазволу памежнай службы можа быць дазволены «гуманітарны пропуск».
Забарона будзе дзейнічаць да 30 лістапада з магчымасьцю падаўжэньня, паведаміў тэлеканал LRT.
Памежныя пераходы закрываюць з прычыны прылётаў аэрастатаў зь Беларусі ў Літву. На мінулым тыдні гэта чатыры разы прымушала літоўскія аэрапорты прыпыняць працу. Перанесьлі і перанакіравалі дзясяткі рэйсаў, гэта закранула некалькі тысяч пасажыраў.
Літва закрыла мяжу 27 кастрычніка пасьля шэрагу інцыдэнтаў, зьвязаных з масавым запускам з тэрыторыі Беларусі паветраных балёнаў нібыта з кантрабандай. У апошнім выпадку ў Літве налічылі 66 аэрастатаў. Праз гэта некалькі разоў спыняў дзейнасьць віленскі аэрапорт і адзін раз — ковенскі.
Міністэрства замежных спраў Беларусі 27 кастрычніка выклікала часовага паверанага ў справах Літвы Эрыкаса Вілканецаса, каб уручыць ноту пратэсту «ў сувязі з чарговым аднабаковым закрыцьцём мяжы з боку Літоўскай Рэспублікі, ажыцьцёўленым безь якога-небудзь папярэдняга паведамленьня».
Да 27 кастрычніка памежная служба Літвы двойчы спыняла дзейнасьць сваіх пунктаў пропуску на мяжы зь Беларусьсю на некалькі гадзін уначы.
Форум