Армэнія дазволіла выезд беларусцы, унесенай у міжнародны вышук з палітычных прычын

Армэнія дазволіла выезд з сваёй тэрыторыі грамадзянцы Беларусі, якую з палітычных матываў унесьлі ў сьпіс для міжнароднага вышуку ўлады Беларусі.

Пра гэта паведаміла прэс-служба намесьніка кіраўніка Аб’яднанага пераходнага кабінэту (АПК) і кіраўніка Народнага антыкрызіснага ўпраўленьня (НАУ) Паўла Латушкі.

У 2020 годзе Натальля (імя зьменена дзеля бясьпекі) удзельнічала ў мірных пратэстах і ўваходзіла ў кіраўніцтва чату, дзе беларусы абмяркоўвалі сытуацыю ў краіне. Яе затрымлівалі паводле палітычных артыкулаў, пасьля допыту яна была вымушана пакінуць Беларусь.

У 2025 годзе, падчас падарожжа, калі Натальля прызямлілася ў Армэніі, ёй паведамілі, што яна ня можа пакінуць краіну, бо знаходзіцца ў міжнародным вышуку на запыт уладаў Беларусі.

У падтрымку Натальлі выступілі Офіс Сьвятланы Ціханоўскай, намесьнік кіраўніцы АПК і кіраўнік НАУ Павал Латушка, «Вясна», фонды BySol і ByHelp, адвакатка Марыя Колесава-Гудзіліна, а таксама праўная камісія Каардынацыйнай рады. Юрыдычную дапамогу ў Армэніі аказвала арганізацыя «Грамадзкі вэрдыкт».

У выніку пасьля разгляду справы Пракуратура Армэніі выдала грамадзянцы Беларусі афіцыйны дазвол на выезд. Беларуска ўжо прыбыла ў Эўрапейскі Зьвяз.

ГЛЯДЗІЦЕ ТАКСАМА:

«Пратрымалі паўтары гадзіны, далі паперу па-грузінску». Гісторыя яшчэ аднаго беларуса, якога не пусьцілі ў Грузію пасьля «візарана»

ГЛЯДЗІЦЕ ТАКСАМА:

«Я нібыта праходжу ў справе таты». Размова зь Дзіянай Маісеенкай, якую затрымалі на грузінска-армянскай мяжы