Такія дадзеныя зьмяшчаюцца ў сумеснай справаздачы Міністэрства рэпатрыяцыі і інтэграцыі Ізраіля і Габрэйскага агенцтва (Сохнут), паведамляе партал vesty.co.il.
Усяго ў Ізраіль за гэты пэрыяд пераехалі 31 тыс. чалавек з амаль 100 краін сьвету, гаворыцца ў дакумэнце.
Больш за ўсё рэпатрыянтаў прыбыло з Расеі — 19 850, далей ідуць ЗША і Канада — 3340 разам, Францыя — 1820, Украіна — 980, Беларусь — 795, Вялікая Брытанія — 560, Аргентына — 450, Грузія — 320, ПАР — 250.
31% рэпатрыянтаў складаюць людзі ва ўзросьце ад 18 да 35 гадоў, 21% — 36-50, 20% — 0-17, 13% — 51-60, 5% — 61-65, астатнія — старэйшыя за 65 гадоў. 52% рэпатрыянтаў — жаночага полу, 48% — мужчынскага.
У справаздачы зазначаецца, што гэтая хваля рэпатрыяцыі прайшла на фоне абвастрэньня сытуацыі ў рэгіёне, выкліканага атакай групоўкі ХАМАС на Ізраіль 7 кастрычніка 2023 году, піша Позірк.
У Ізраілі працягваецца распачатая ў кастрычніку мінулага года ваенная апэрацыя Ізраіля ў сэктары Газа, якая стала адказам на напад тэрарыстаў групоўкі ХАМАС на ўдзельнікаў музычнага фэстывалю, які праходзіў 7 кастрычніка каля мяжы з сэктарам Газа. У выніку тэрарыстычнага нападу ў Ізраілі загінула 1,2 тыс. чалавек з 37 краін, у тым ліку трое грамадзян Беларусі; пацярпелі 7,3 тыс.
23 верасьня пачалася новая фаза вайны на Блізкім Усходзе: Ізраіль атакаваў тысячы цэляў у Лібане, Міністэрства аховы здароўя гэтай краіны паведаміла аб сотнях забітых і тысячах параненых.
Ваенная апэрацыя ў Лібане атрымала назву «Стрэлы поўначы». Начальнік Генштаба Ізраіля абазначыў яе мэтай зьнішчэньне баявой інфраструктуры, якая выкарыстоўваецца баевікамі «Хэзбалы», а таксама вяртаньне жыхароў паўночных раёнаў Ізраіля ў свае дамы, якія яны былі вымушаны пакінуць у выніку пастаянных ракетных абстрэлаў (паводле дадзеных ізраільскага боку, з кастрычніка мінулага году зь Лібана было выпушчана ня менш за 7000 ракет), а таксама запускаў бесьпілётных лятальных апаратаў з тэрыторыі Лібана.
Увечары 1 кастрычніка Іран зрабіў ракетную атаку на Ізраіль. Па тэрыторыі дзяржавы было запушчана каля 200 балістычных снарадаў.
Перад атакай у прыгарадзе Тэль-Авіва Яфа тэрарысты расстралялі людзей на прыпынку грамадзкага транспарту. Загінула ня менш за сем чалавек. Яшчэ 16, у тым ліку грамадзянін Беларусі, атрымалі раненьні рознай ступені цяжкасьці.
У Корпусе вартавых ісламскай рэвалюцыі заявілі, што атака зьяўляецца адказам на забойства лідэра ХАМАС Ісмаіла Ханіі, лідэра «Хэзбалы» Хасана Насралы і камандуючага Корпусам Абаса Нільфрушана 20 верасьня ў Бэйруце.
Рэпатрыяцыя ў Ізраіль (алія) — вяртаньне ў краіну людзей габрэйскай нацыянальнасьці. Рэгулюецца спэцыяльным «Законам аб вяртаньні».
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў. Аднак ужо неўзабаве гэты мірны плян правалілі.
- 8 кастрычніка на пасярэдніцкіх перамовах у Эгіпце два бакі ў чарговы раз дамовіліся пра спыненьне агню. Гэта першая частка годы, распрацаванай адміністрацыяй прэзыдэнта Злучаных Штатаў Дональда Трампа.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум