Прэмію ў эканоміцы 13 кастрычніка атрымалі навукоўцы Ёэль Мукір, Філіп Аґ’ён, Пітэр Говіт «за тлумачэньне эканамічнага росту, абумоўленага інавацыямі».
Пра гэта паведаміла Каралеўская швэдзкая акадэмія навук на цырымоніі ў Стакольме, завяршаючы Нобэлеўскі тыдзень.
«Ляўрэаты навучылі нас, што ўстойлівы рост нельга ўспрымаць як належнае, — гаворыцца ў заяве арганізацыі, якая прысуджае прэмію. — Эканамічная стагнацыя, а ня рост, была нормай на працягу большай часткі гісторыі чалавецтва. Іхная праца паказвае, што мы павінны ўсьведамляць пагрозы для далейшага росту і супрацьстаяць ім», — піша Reuters.
Каму дасталіся Нобэлеўскія прэміі 2025 году
У Осла назвалі ляўрэаткай Нобэлеўскай прэміі міру 2025 году Марыю Карыну Мачада.
Уладальнікам Нобэлеўскай прэміі ў літаратуры 2025 году стаў вугорскі празаік і сцэнарыст Ласла Краснагоркаі.
Краснагоркаі лічаць найважнейшым жывым аўтарам Вугоршчыны. Ён дасьледуе ў сваіх творах тэмы постмадэрнісцкай дыстапіі і мэлянхоліі.
Швэдзкая акадэмія ўшанавала яго за «пераканаўчую і празарлівую творчасьць, якая сярод апакаліптычнага жаху пацьвярджае сілу мастацтва».
Нобэлеўскую прэмію ў хіміі за 2025 год атрымалі трое навукоўцаў — Сусуму Кітагава, Рычард Робсан і Омар Ягі. Яны ўзнагароджаныя «за распрацоўку мэталаарганічных каркасаў».
Нобэлеўскі камітэт прысудзіў прэмію 2025 году ў галіне фізыкі таксама траім навукоўцам. Гэта Джон Кларк, Мішэль Дэварэ і Джон Мартыніс. Прэмію прысудзілі «за адкрыцьцё макраскапічнага квантава-мэханічнага тунэляваньня і квантаваньня энэргіі ў электрычным ланцугу».
Нобэлеўская прэмія ў фізіялёгіі і мэдыцыне прысуджана за дасьледаваньні ў галіне імуналёгіі. Яе атрымалі трое навукоўцаў з ЗША і Японіі — Мэры Бранкаў, Фрэд Рэмсдэл і Сімон Сакаґуці. Іх адзначылі за дасьледаваньні, зьвязаныя з пэрыфэрычнай імуннай талерантнасьцю.
- Ляўрэатаў запрашаюць атрымаць узнагароды на цырымоніі 10 сьнежня, у гадавіну сьмерці Альфрэда Нобэля. Прэмія міру ўручаецца ў Осла, згодна зь ягоным жаданьнем, а іншыя цырымоніі ўзнагароджаньня праходзяць у Стакгольме.
- Прэмія прадугледжвае грашовую ўзнагароду ў 11 мільёнаў швэдзкіх кронаў (1 мільён даляраў) з спадчыны стваральніка прэміі, швэдзкага вынаходніка Альфрэда Нобэля. Яна прысуджалася 117 разоў.
- Сярод грамадзян Беларусі ёсьць двое нобэлеўскіх ляўрэатаў: Сьвятлана Алексіевіч (прэмія ў літаратуры 2015 году) і Алесь Бяляцкі (прэмія міру 2022 году).
