«Адзін з трох „Арэшнікаў“ былі пасьпяхова зьнішчаныя на іх тэрыторыі ў Капусьціным Яры сіламі Галоўнага ўпраўленьня выведкі, СБУ і Службы замежнай выведкі», — сказаў Васіль Малюк на нарадзе з прэзыдэнтам Украіны Ўладзімірам Зяленскім.
Паводле яго, гэта адбылося летам 2023 году да таго, як публічна ў Расеі заявілі пра існаваньне такіх ракет. Згодна зь інфармацыяй украінскага боку, летась у Расеі зрабілі тры комплексы «Арэшнік», а цяпер могуць ствараць па шэсьць на год.
У сваю чаргу прэзыдэнт Украіны Ўладзімір Зяленскі заклікаў эўрапейскія краіны адрэагаваць на разьмяшчэньне расейскіх ракет «Арэшнік» у Беларусі і ўвесьці санкцыі супраць 25 прадпрыемстваў Расеі, якія ўдзельнічаюць у іх вытворчасьці.
«Яны хочуць разьмясьціць „Арэшнік“ у Беларусі. Мы разумеем, прыблізны радыюс дзеяньня 5 тысяч кілямэтраў. То бок эўрапейцам, асабліва ва Ўсходняй Эўропе трэба зьвярнуць на гэта ўвагу, і нашым балтыйскім калегам, і ўсім, на гэтыя рызыкі», — адзначыў Уладзімір Зяленскі.
Прэзыдэнт Украіны дадаў, што ўкраінскі бок падрыхтаваў сьпіс прадпрыемстваў, якія ўдзельнічаюць у вытворчасьці гэтых ракет для ўвядзеньня супраць іх міжнародных санкцый.
«25 вытворцаў, якія працуюць на тое, каб яны маглі вырабляць „Арэшнікі“, расейскіх кампаній, і яны не знаходзяцца пад санкцыямі. Гэта важна», — падкрэсьліў ён.
У сакавіку 2025 году Аляксандар Лукашэнка заявіў, што да канца году Масква перадасьць Беларусі некалькі ракетных комплексаў «Арэшнік». Пускавыя ўстаноўкі для ракетнага комплексу, адзначыў ён, вырабляюць у Беларусі. Пазьней удакладнілі, што гэта можа адбыцца ў сьнежні.
Форум