Ужо сёньня: Дзень нараджэньня беларускага перакладчыка і пісьменьніка Карласа Шэрмана

Дата дня

25 кастрычніка 1934 году нарадзіўся беларускі перакладчык і літаратар уругвайскага паходжаньня Карлас Шэрман.

Карлас Шэрман перакладаў і пісаў на гішпанскай (роднай), беларускай і расейскай мовах. Быў першым віцэ-прэзыдэнтам Беларускага ПЭН-цэнтру (1989–2001 гг.), стаўшы фактычна адным зь яго заснавальнікаў. Быў сябрам навукова-экспэртнай Рады Беларускага Калегіюму.

Гэты дзень у гісторыі

1902 — была асьвячоная менская мячэць, помнік архітэктуры ХІХ стагодзьдзя.

1920 — войскі генэрала Станіслава Булак-Балаховіча (15 тыс.) перайшлі часовую мяжу, пачаўшы ваенныя дзеяньні супраць Чырвонай Арміі.

2010 — у Пінску на заводзе «Пінскдрэў» адбыўся выбух і пажар, які забраў жыцьці 14 чалавек.

2020 — напярэдадні абвешчанага Сьвятланай Ціханоўскай усеагульнага страйку ў Менску і іншых гарадах краіны адбыўся «Марш народнага ўльтыматуму». У Менску марш сабраў звыш 100 тысяч удзельнікаў і завяршыўся жорсткім разгонам.

У гэты дзень нарадзіліся

1858 — Эдвард Пякарскі, этнограф, якутазнаўца.

1868 — Карл Грыгаровіч, скрыпач, прафэсар народнае кансэрваторыі ў Віцебску. Расстраляны пры спробе зьбегчы за мяжу (1921).

1881 — Пабла Пікаса, гішпанскі мастак.

1884 — Сяргей Дубінскі, археоляг і гісторык. Ахвяра сталінізму.

1913 — Уладзімер Цясьлюк, беларускі кінаапэратар і рэжысэр.

1925 — Леў Мірачыцкі, беларускі гісторык-славіст, літаратар.

1932 — Уладзімер Анісковіч, літаратурны крытык, перакладнік баўгарскай літаратуры.

1933 — Нэлі Шчасная, беларуская мастачка.

1936 — Віктар Тураў, беларускі кінарэжысэр. Сярод прац Турава — экранізацыя раманаў Івана Мележа «Людзі на балоце» і «Подых навальніцы».

У памяці

1647 — Эванджэліста Тарычэлі, італьянскі фізык і матэматык, які першы зьмерыў атмасфэрны ціск.

1942 — Хвядос Шынклер, пісьменьнік, пачынальнік урбаністычнай тэмы ў беларускай літаратуры, загінуў на фронце пад Сталінградам.

1958 — Вольфганг Паўлі, аўстрыйскі фізык, ляўрэат Нобэлеўскай прэміі 1945 году.

1983 — Мар’ян Пецюкевіч, дзеяч заходнебеларускага нацыянальнага руху, этнограф.

1991 —Міхась Міцкевіч, беларускі грамадзка-культурны, рэлігійны і сьвецкі дзеяч эміграцыі, малодшы брат Якуба Коласа.

1995 — Лявон Случанін, беларускі паэт.