Пінск і Берасьце сталі цэнтрамі ўрачыстасьцяў у гонар 100-годзьдзя Пінскай дыяцэзіі
Юбілейныя захады сёньня праходзяць у Пінску. Пачаліся яны ў катэдральным касьцёле Унебаўшэсця Найсьвяцейшай Панны Марыі з малітвы прыхаджан нябеснаму заступніку Пінскай дыяцэзіі сьвятому Андрэю Баболю і ўнясеньня рэлікварыю з часьцінкай яго мошчаў. Падчас імшы кардынал Кляўдыё Гуджэроцьці ўзначаліць літургію.
Урачыстасьці працягнуцца 26 кастрычніка ў Берасьці.
Пінская дыяцэзія была заснаваная 25 кастрычніка 1925 году. Цяпер гэта адна з чатырох каталіцкіх акругаў у Беларусі, яна ахоплівае тэрыторыю Берасьцкай і Гомельскай вобласьцяў.
26 кастрычніка пасланьнік папы Рымскага сустрэнецца з моладзьдзю ў берасьцейскім касьцёле Ўзвышэньня Сьвятога Крыжа і правядзе там імшу. Пасьля гэтага там пройдуць пачастунак, майстар-клясы для моладзі, музычнае праслаўленьне і падвядзеньне вынікаў Юбілейнай сустрэчы моладзі.
Гэта першы раз, калі пасланец папы наведвае Беларусь у тытуле кардынала. Гуджэроцьці добра вядомы беларусам, у тым ліку каталікам. Ён чатыры гады (2011–2015) быў у Беларусі нунцыем — дыпляматычным прадстаўніком папы. Пасьля ён прыяжджаў у краіну як пасланьнік папы ў сьнежні 2020 году і ўлетку 2023 году — на Будслаўскі фэст.
Апошні раз наведваў Беларусь такі высокі (і нават вышэйшы) госьць з Ватыкану дзесяць гадоў таму. Гэта быў дзяржаўны сакратар Ватыкану пры тады яшчэ папу Францішку П’етра Паралін.
Форум