Празь некалькі гадзін для вырашэньня праблемы з чэргамі за кавай міністар унутраных спраў Беларусі Іван Кубракоў сабраў тэрміновую нараду — яе вынікам стала даручэньне стварыць рэйдавыя групы для маніторынгу за сытуацыяй.
Увечары дзяржаўныя СМІ адрапартавалі, што такія групы ўжо зьявіліся на запраўках, а АЗС «Беларуснафта» тэрмінова зрабіла сацыяльныя ролікі.
Рэйдавыя групы пачалі працаваць з апярэджваньнем графіку
Рэйдавыя групы, якія зьбіраліся стварыць з супрацоўнікаў міліцыі грамадзкай бясьпекі і ДАІ, павінны былі пачаць сваю працу 20 кастрычніка. Аднак, як вынікае з рэпартажу дзяржаўнага тэлеканалу СТБ, ДАІ датэрмінова пачала сваю працу. Паведамілі, што для кантролю за тымі, хто «некарэктна» паркуе свае аўтамабілі на запраўках будуць назіраць і праз Рэспубліканскую сыстэму маніторынгу грамадзкай бясьпекі, то бок пры дапамозе відэакамэр.
У той жа час у відэаматэрыяле не заўважныя чэргі.
Аналягічная сытуацыя і ў Магілёве. Абласное выданьне Mogilevnews.by паведаміла, што супрацоўнікі ДАІ вобласьці ўжо пачалі праверкі АЭС «на выкананьне даручэньняў» Аляксандра Лукашэнкі і Івана Кубракова.
«Інспэктары ў часе нясеньня службы наведваюць АЗС, разьмешчаныя па маршрутах патруляваньня, ацэньваюць абстаноўку з пункту гледжаньня дарожнай бясьпекі і папярэджаньня ўскладненьня руху. Пры выяўленьні парушэньня прымаюць апэратыўныя меры рэагаваньня», — адзначыла выданьне.
Аднак інфармацыя аб колькасьці такіх парушэньняў у публікацыі адсутнічае.
У іншых абласьцях на момант публікацыі пакуль не паказвалі, як працуюць рэйдавыя групы.
«Заправіліся — вызваліце калёнку для іншых!» Як адрэагавалі сеткі АЗС
На старонцы АЗС «Беларуснафта» ў Instagram ужо ўвечары 16 кастрычніка зьявіліся два сацыяльныя ролікі, у якіх аўтамабілістаў заклікалі паважаць адзін аднаго, а пасьля запраўкі спачатку ставіць машыну на паркоўку, а толькі потым ісьці па каву.
«Так вы зможаце спакойна паесьці, а іншыя кіроўцы ня будуць стаяць у чэргах», — адзначаецца ў апублікаваных допісах.
Карыстальнікі пад гэтымі публікацыямі зьдзіўляюцца:
«Няўжо на ўзроўні сетак АЗС гэтае пытаньне нельга было вырашыць? Патрэбна абавязкова магутна, на ўсю краіну, зь міліцыяй?».
Іншыя заўважылі, што апошнія два тыдні на запраўках гучаць абвесткі з просьбай да аўтамабілістаў перапаркоўваць машыны пасьля запраўкі. Іншыя прапаноўваюць разьдзяліць касы на тыя, у якіх аплочваюць ежу і каву, і тыя, дзе можна разьлічыцца за аўтамабільнае паліва.
У сеткі АЗС «Лукойл Беларусь» няма старонкі ў Instagram. На яе сайце тэма чэргаў увогуле адсутнічае.
Сетка заправак А-100 таксама пакуль не адрэагавала на кампанію супраць чэргаў за кавай. На апошніх некалькіх допісах на старонцы ў Instagram кампанія наадварот рэклямуе свае кавярні і прапануе за кожны кубачак кавы балы для зьніжкі на ежу, тавары і паліва.
Сетка АЗС «Газпромнефть» у Беларусі, як і А-100, таксама заклікае кіроўцаў больш актыўна карыстацца паслугамі кавярні, каб атрымаць дадатковыя бонусы. На запраўках гэтай сеткі да 31 кастрычніка дзейнічае акцыя «Кававы буст» — за пяць набытых кубкаў кавы абяцаюць вярнуць вартасьць аднаго зь іх баламі для зьніжкі.
Форум